Қарақалпақстан Республикасы Санитариялық-эпидемиологиялық тынышлық орайы Жәмийетшилик пенен ислесиў бөлими

Қарақалпақстан Республикасы Санитариялық-эпидемиологиялық тынышлық орайы Жәмийетшилик пенен ислесиў бөлиминиң усы жыл
9-июль күнги мағлыўматларына қарағанда, усы күнге шекем 37815 пуқара коронавирусқа тексерилип, соннан 175 пуқарада коронавирус инфекциясы тастыйықланды.
Бүгинги күнге шекем республикамыз аймағында 19081 пуқара 14 күнлик медициналық бақлаўға алынған еди. Олардан 16363 пуқара кеселликтиң клиникалық белгилери жүзеге келмегенлиги, кеселлик анықланбағанлығы себепли 14 күнлик медициналық бақлаў астынан шығарылды. Ҳәзирги ўақытта 2718 пуқарада медициналық бақлаў даўам етпекте, соннан 260 пуқара арнаўлы карантин орынларында, 2458 пуқара үйлеринде бақлаўда турыпты.
Мәмлекетимизге шет еллерден кирип киятырған халықаралық ири жүк автотранспорт айдаўшыларында коронавирус инфекциясына тексериў жолға қойылған. Усы күнге шекем Даўыт ата постынан улыўма 6150 пуқара лабораториялық усылда тексерилген.
Карантин талапларын бузғанлығы ушын 15110 пуқараға ҳәкимшилик шара көрилген болса, 2 пуқараға жынайы ис қозғатылған, бирақ соған қарамастан айрым пуқараларымыз Дүнья жүзинде сол менен бирге мәмлекетимизде болып атырған бул жағдайларға итибарсызлық пенен қарамақта ҳәм карантин қағыйдаларын бузыўды даўам етпекте. Бул болса пуқаралардың өзлериниң ҳәм шаңарақ ағзаларының, жақынларының, әтираптағы басқа барлық пуқаралар өмирине қәўип туўдырмақта.
Сөзимиз соңында бул кеселлик пенен аўырмаў ҳәм басқаларға жуқтырмаў, аймағымызды сары оннан соң жасыл зоналарға өткериў ушын ҳәр бир пуқара өзинде жеке жуўапкершилик сезе билиўи, жеке гигиена қағыйдаларына әмел етиўи, зәрүрлик болмаса үйден шықпастан басқалар менен қатнаста болыўды кемейтиў керек.
Егер Сиз ден саўлығыңызда өзгерис сезип, кеселлик белгилери пайда болған болса ўақытты өткерместен, тезлик пенен тез жәрдем 103 телефон номери арқалы шыпакерге мүрәжат етиўиңиз керек.
t.me/qqsanepid