Коронавирус инфекциясына қарсы профилактикалық шаншыў – бүгинги пандемияны тоқтатыўдағы әҳмийетли ҳаққында


Коронавирус инфекциясына қарсы профилактикалық шаншыў – бүгинги пандемияны тоқтатыўдағы әҳмийетли ҳаққында

2021-жыл 5-март күни Шоманай районы медицина бирлеспесиниң мәжилислер залында Қарақалпақстан Республикасы Санитария эпидемиологиялық тынышлық ҳәм жәмийет саламатлығы басқармасы баслығының биринши орынбасары В.Абсаттарова ҳәм Қарақалпақстан Республикасы Денсаўлықты сақлаў Министрлигиниң штаттан тыс иммунологы М.Тәжиниязовалар тәрепинен Коронавирус инфекциясына қарсы ғалаба шаншыў күнлерин өткериўге қатнасыўшы медицина хызметкерлериниң билимин асырыў бойынша оқыў семинары өткерилди. Семинарға районлық медицина бирлеспеси ҳәм санитария эпидемиологиялық тынышлық ҳәм жәмийет саламатлығы бөлиминиң тийисли қәнигелери қатнасты. Семинар даўамында қанигелер тәрепинен шаншыў өткерилетуғын орынларда әмелдеги санитария норма ҳәм қағыйдаларына қатаң түрде әмел етилиўи кереклиги айтып өтилди ҳәм сапалы шаншыў жумысларын өткериў, шаншыўдан кейинги асқыныўлар үстинен қадағалаў, вакциналардың сақланыўы, тасылыўы, олардың жумсалыўы, шаншыў техникасы, шаншыўдан кейинги келип шыққан медициналық шығындыларды белгиленген орынларда жоқ етиў тәртиплери ҳаққында семинар қатнасыўшыларына кеңнен түсиник берип өтти. Буннан соң медицина хызметкерлериниң билим дәрежесин және де асырыў ушын коронавирус инфекциясына қарсы қолланылатуғын вакциналардың түрлери, олардың әҳмийети ҳәм шаншыў техникалары бойынша видеороликлер қойып көрсетилди.

 

Шоманай районы СЭТ ҳәм ЖСБ жәмийетшилик пенен ислесиў бөлими