«Адамлардың суўға шөгип кетиўи менен байланыслы жағдайларда қутқарыў жумысларын алып барыў бойынша» әмелий-тактикалық оқыў шынығыўы өткерилди

Қарақалпақстан Республикасы Министрлер Кеңесиниң баслығы- Пуқара қорғаныўы баслығының 2021-жыл 3-июнь күнги «Айрықша жағдайлардың алдын алыў ҳәм оларды сапластырыў бойынша Қарақалпақстан Республикасы аймақлық комиссиясы мәжилиси» шешими тийкарында усы жылдың 5-июнь күни Нөкис районында «Саманбай» АПЖ аймағындағы «Бессаға» суў бөлистириў қурылмасы әтирапында «Адамлардың суўға шөгип кетиўи менен байланыслы жағдайларда қутқарыў жумысларын алып барыў» темасында көргизбели арнаўлы-тактикалық оқыў шынығыўы өткерилди.
Оқыў шынығыўының биринши басқышында, республикада суўға шөгиў менен байланыслы жағдайлар, шомылыў орынларына қойылған талаплар, шомылыў орнында жәмийетлик тәртипти сақлаў талаплары, бундай талаплар бузылған жағдайда көрилетуғын тийисли шаралар бойынша тийисли шөлкемлердиң мағлыўматлары тыңланды.

Екинши әмелий басқышында, Нөкис районлық санитария-эпидемиологиялық тынышлық ҳәм жәмийет саламатлығы бөлими, Ишки ислар, Миллий гвардия, экология ҳәм қоршаған орталықты көрғаў бөлими, аўыл пуқаралар жыйыны қәнигелеринен ибәрат исши топардың белгиленбеген шомылыў орынларында рейд өткериў тәртиби әмелде көрсетилип, шомылып атырған пуқаралардың қырағылығын асырыўға ҳәм суўға шөгиў жағдайларының алдын алыў бойынша профилактикалық илажлар әмелге асырылды.
Оннан соң, суўға шөгиў жағдайы жүз бергенде оны кутқарыў, тийисли биринши медициналық жәрдем көрсетиў, жәмийет тәртибин сақлаў бойынша тийисли хызметлердиң жумысы әмелде көрсетип берилди.

Нөкис районы СЭТҳЖС бөлими хызметкерлери тәрепинен суў арқалы жуғыўы мүмкин болған кеселликлердиң алдың алыў мақсетинде ашық суў дәреклериндеги жуқпалы кеселликлер қозғатыўшыларын анықлаў мақсетинде лабораториялық тексериў ушын сынамалар алыў тәртиби әмелде көрсетип берилди.

Оқыў шынығыўы жуўмағында жыйналғанлардың қызықтырған сораўларына жуўаплар берилип, усыныслары тыңланды.

Қарақалпақстан Республикасы
Санитария-эпидемиологиялық тынышлық
ҳәм жәмийет саламатлығы басқармасы
аса қәўипли жуқпалы кеселликлер
бөлими меңгериўшиси И.Байназаров