Коронавирусқа қарсы емлениң ҳәм қәӯетирсиз жасаң!

Ҳәммеге белгили ҳәзирги ӯақытта республикамызда халықты басқышпа-басқыш коронавирусқа қарсы ғалабалық шаншыӯ иләжлары алып барылмақта. Соңғы күнлерде коронавирус инфекциясы менен кеселлениӯ жағдайларының артып барыӯы, шаншыӯ иләжларын жәнеде тезлестириӯди талап етпекте. Бүгинги күнге шекем республикамызға 284000 доза, соннан 32000 доза “Astra Zneka”, 244800 доза “ZF-UZ-VAK 2001” ҳәм 7200 доза “Спутник V” вакциналары алып келинген болып 1,2 ҳәм 3-басқыш шаншыӯ иләжларын өткериӯ ушын орынларға тарқатылған.
Усы күнге шекем 1-басқыш пенен жәми 93996 пуқара коронаирусқа қарсы шаншылған болып, Соннан 65 жастан жоқары 17640, медицина хызметкерлери 17860, халық тәлими хызметкерлери 21096, МТМ хызметкерлери 7774, хроник кеселликлери бар болған пуқаралар саны 17553 ҳәм басқада топарларға кириӯши 12028 пуқаралар вакцина менен емленди. Сол менен бирге шаншыӯға киритилген қәӯипли топар контингентлерине 50 жастан жоқары ҳәм арнаӯлы оқыӯ тәлим мекемелери оқытыӯшылары ҳәм ғалаба хабар қураллары хызметкерлери-журналист, жазыӯшы, блогерлердиң дизими дүзилип, олардың коронавирус инфекциясына қарсы шаншылыӯын шөлкемлестириӯ иләжлары басланды.
Шаншыӯ иләжларын өткизиӯден тийкарғы мақсет, кеселлениӯшиликти, сондай-ак, бул кеселликтен жүзеге келетуғын өлимшилик жағдайларын болдырмаӯдан ибарат. Кеселликке қарсы шаншыӯ өткизилгеннен кейин организимде вирусқа қарсы антиденешелер пайда болады. Бул антиденешелер организимге вирус түскенде кеселлик шақырыӯ дәрежесине шекем көбейиӯге үлгерместен оларды жоқ етиӯ ушын организимдеги иммун клеткаларды жибереди. Нәтийжеде кеселликке шалыныӯ итималы пәсейеди, егерде кеселлик жүзеге келген жағдайда да жеңил кешиӯин тәмийнлейди.
Ҳүрметли пуқаралар, сизлердиң өз ӯақтында емлениӯиңиз ҳәм карантин қағыйдаларына әмел етиӯиңиз тек ғана өзиңизди қорғап қоймастан жақынларыңыздыңда саламатлығын сақлаӯда үлкен рөл атқарады. Сондай екен, коронавирусқа қарсы емлениң ҳәм қәӯетирсиз жасаң!

Қарақалпақстан Республикасы Санитария-эпидемиологиялық тынышлық ҳәм жәмийет саламатлығы басқармасының жәмийетшилик пенен ислесиӯ бөлими.