Қарақалпақстан Республикасы аймағында коронавирус инфекциясына қарсы шаншыӯ иләжлары ҳаққында.

Дүнья жүзи ден саӯлықты сақлаӯ шөлкеминиӊ мағлыӯматы бойынша жер жүзинде COVID-19 инфекциясы бойынша эпидемиологиялық жағдай қурамаласып бармақта. 2021-жылдыӊ 14-июль күнине коронавирус инфекциясын жуқтырғанлар -186 млн болып, соннан 4 млн 065 мыӊы өлген. Кеселлик тийкарынан Америка, Индия, Бразилия, Россия, Франция, Турция мамлекетлеринде жағдай кескинлескенлигинше қалмақта.
Қарақалпақстан Республикасында 13-июль күни 140 жағдай дизимге алынған, соннан, емлеӯханада 92 пухара емленип атыр, аӯыр жағдайдағы наӯқаслар 12ни қурайды.
Бүгинги күнде дүнья жүзиндеги сыяқлы бизиң республикамызда да коронавирус инфекциясының жағдайы шийелениспекте ҳәм оны жылаӯлаӯ мақсетинде барлық иләжлар әмелге асырылмақта. Коронавирус инфекциясына қарсы шаншыӯ кеселликке қарсы гүресиӯдиң ең исенимли жолы екенлиги өзиниң дәлийиллин таппақта.
Өзбекстан Республикасы ден саӯлықты сақлаӯ министрлигиниң 2021-жыл 15-февраль күнги №31-санлы “Коронавирус инфекциясына қарсы массалық шаншыӯ иләжларына таярлық көриӯ ҳәм өткериӯ” ҳаққындағы буйрығы тийкарында 2021-жылдың 1-апрель күнинен баслап коронавирус инфекциясына қарсы профилактикалық шаншыӯ өткерилмекте.
Республикамызда коронавирус вакцинасын сақлаӯ ушын суӯытыӯшы үскенелер ревизияланып, жарамсызлары ремонтланды. 151 шаншыӯ ханалары ҳәм 18 вакцина сақлаӯ складлары бар болып булыр 45 дана морозильник, 270 дана холодильник 3 дана сууытыӯшы камералар менен тәмийинленген. Буннан басқа ҳәзирги күнде ЮНИСЕФ балалар шөлкеми тәрепинен берилген 127 жаӊа холодильниклер шаншыӯ ханаларына берилди. Вакцинаны тасыӯ ушын 846 термосумка ҳәм 222 термоконтейнерлер бар. Бул вакциналарды сақлаӯ ушын жетерли болып есапланады. Бүгинги күнде вакцинаны аймақларға жеткерип бериӯ мақсетинде ЮНИСЕФ балалар шөлкеми тәрепинен берилген 1 дана ЖАК(афторефрижератор) ҳәм 17 дана минивен. Бул автомашиналардыӊ жәрдеминде вакциналарды тасыӯда суӯықлық шынжыры қағыйдаларыныӊ сақланыӯы беккемленди.
Аймағымызда коронавирус инфекциясына қарсы шаншыӯ Өзбекстан Республикасы Ден саӯлықты сақлаӯ министрлигиниӊ 6-апрель 2015-жылғы 0239-07/3-санлы Санитария қағыйдалары ҳәм нормалары тийкарында өткерилмекте.
Бул СанҚҳН талабын орынлаӯ мақсетинде бүгинги күнде 238 шаншыӯ бригадаларыныӊ қурамындағы 981 медицина қәнийгесин, (259 врач, 486 вакцинатор ҳәм дублерлары) қайта таярлықтан өткерип билими асырылды.
Өзбекстан Республикасы санитария эпидемиологиялық тынышлық ҳəм жəмийет саламатлығы хызметиниӊ 2021-жыл 30-июнь күнги №15-8/4864 санлы “Көрсетпе хат”ы тийкарында 2021-жылдың 30-июнь күнинен баслап 18 жастан жоқары барлық халықты COVID-19 ға қарсы шаншыӯ басланды.
Коронавирусқа қарсы шаншыӯды жеделлестириӯ мақсетинде қосымша шаншыӯ бригадаларын шолкемлестириӯ иләжлары алып барылмақта.
Республика арнаӯлы комиссиясының 2021-жыл 6-июль күнги 77-санлы баянының тапсырмасы тийкарында республикамыз аймағында жайласқан Ири шөлкемлер, макеме, аэропорт, вокзал, супермаркет, базар, аӯыл пухаралар жыйынларында ислеп атырған қәнийгелерди коронавирус инфекциясына қарсы шаншыӯ өткериӯ ушын ӯақтыншалық шаншыӯ ханалары шөлкемлестирилмекте.
Коронавирус кеселлигине қарсы шаншыӯ ықтыярлы түрде өткериледи.
Республикамыз аймагында коронавирус инфекциясына карсы профилактикалык шаншыу максетинде 32000 доза Astra Zeneka, 9000 доза Спутник хам 310400 доза ZF-UZ-VAC2001 вакцинасы алып келинди. Жәми: 351400 доза. Бүгинги күнге шекем республикамызда: 233911 шаншыӯ өткерилди, соннан 1-дозасы менен 142007 пухара шаншылды. Атап айтқанда 65 жастан жокары болган 18902 адамлар хам 19940 медицина, мектеп оқытыӯшылар 23592, мектепке шекемги билимлендириу канийгелери 9007, хроник кеселликлери болған пухаралар-22065, қураллы күшлер ҳәм ҳуқық қорғаӯ органлары қәнийгелери-7338, басқалар-41163. Жәми-142007 пухара 1-дозасы менен профилактикалык шаншылды. Бүгинги күнге шекем профилактикалық шаншылғанлар арасында жағымсыз жағдайлар дизимге алынбады.
Усының менен биргеликте; республикамыз аймағындағы коронавирус инфекциясын жылаӯлаӯ мақсетинде пухараларды коронавирус инфекциясына қарсы шаншыӯ алыӯға аймақлық емлеӯ профилактика макемелерине келип шаныштырыӯға шақырып қаламан.

Қарақалпақстан Республикасы Санитария эпидемиологиялық тынышлық ҳәм жәмийет саламатлығы басқармасының иммунопрофилактика бөлими меңгериӯшиси А.Досымбетов