Капустаның инсан саламатлығы ушын пайдалы тәреплери.

Капуста инсан саламатлығы ушын жүдә пайдалы өним. Капустаның қурамында қант, органик кислоталар, витаминлер(С, Р, В, В2, РР, К, Е), каротин, пантотен ҳәм фолат кислоталары, май, ферментлер, фитонцидлер, калий, кальций, йод, марганец, темир ҳәм басқа элементлердиң дузлары бар. Капуста халық медицинасында ҳәр қыйлы кеселликлерге ислетиледи, организимнен. Дузланған капуста қурамындағы уксус ҳәм сүт кислоталары организимнен ширитиӯши бактерияларды шығарып жибериӯ қәсийетине ийе. Қурамында сахароза ҳәм крахмал муғдары аз болғанлықтан таза капустаны жеӯ диабетиклер ушында жүдә пайдалы. Буннан тысқары капустаны азыӯды қәлеӯшилерде аӯқат рационына киргизиӯи мүмкин. Капустадағы ишеклер искерлигин жақсылаӯшы бириктириӯши затлар организимдеги ҳәр түрли шлак ҳәм холестеринди тазалаӯ менен бир қатарда ишеклерде пайдалы микрофлораны формаландырыӯдада жәрдемлеседи. Териниң күйген, ириңли жара, суӯық урған ҳәм көгерген жерлерге майдаланған капуста жапырағын компрес қылып қойылса бул жарқатлардың питиӯин тезлестиреди. Қандағы қант муғдарын кемейтиӯ ушын капуста шербетине жыллы суӯ қосып, аӯқатланыӯдан ярым саат алдын ярым стаканнан ишиледи.Капуста шербетин ишиӯ жүзге тасқан сепкилди жоқ  етиӯгеде жәрдемлеседи. Буннан басқа сары аӯрыӯ, иш қатыӯ, гемарой, гастрит, асқазан ширеси нормадан пәс жүргенде, бийпушлықта, дисбактериозда ҳәм барқулла шаршап жүретуғын адамларға капуста шербетин ишиӯ усынылады.

Капустаны қабыл етип болмайтуғын жағдайлар: панкреатитте организимниң қарын ҳәм көкирек бөлиминде хирургиялық операцияларды басынан кеширген адамлар жаңа капустаны жеӯден өзлерин тыйыӯы керек Асқазан ҳәм ишек жолларында қан ағыӯы, қалқансыман без искерлигиниң бузылыӯы жағдайларында капуста жеӯге болмайды. Капуста шербетин ишиӯ асқазанында шире ажыратылыӯы нормадан жоқары болған адамларға мүмкин емес, себеби капуста шербети асқазан бези искерлигин күшейтеди. Гастрит, панкреатит, асқазан жарасы, қан басымы, баӯыр ҳәм буйреклеринде кеселликлери болған адамларға дузланған капуста жеӯге рухсат етилмейди.

 

 

Қарақалпақстан Республикасы Санитария-эпидемиологиялық тынышлық ҳәм жәмийет саламатлығы басқармасының жәмийетшилик пенен бирге ислесиӯ бөлими.