Шоманай районы орайында жайласқан “GOLDEN HOUSE” азық-аўқат саўда маркети бойынша мағлыумат

Усы жылдың 18-август күни «Келешек ушын» (https://t.me/keleshek_kr) атлы социаллық тармақта жәрияланған видео көринисте Шоманай районы орайында жайласқан “GOLDEN HOUSE” азық-аўқат саўда маркетинде ислеп шығарылған сәнеси көрсетилмеген ямаса жарамлылық мүддети өткен қадақланған хрустящка ҳәм вермишел (Rollton) өнимлериниң сатылып атырғанлығы ҳәм бундай жағдайлар саўда маркетинде алдыңғы ўақытларыда ушырасқанлығы көрсетилген.   Телеграмм каналында жәрияланған видеода көрсетилген жағдайлардан келип шығып, Өзбекстан Республикасы Президенти жанындағы исбилерменлик субъектлериниӊ ҳуқықлары ҳәм нызамлы мәплерин қорғаӯ бойынша ӯәкилди 19.08.2021ж күни хабардар еткен халда Қарақалпақстан Республикасы санитария-эпидемиологиялық тынышлық ҳәм жәмийет саламатлығы басқармасы тәрепинен 2021 жыл 20-август күни Шоманай районы, Өзбекстан көшеси, номерсиз жайда жайласқан “SHOMANAY GOLDEN HOUSE” жуўапкершилиги шекленген жәмийетине (кейинги орынларда ЖШЖ) қараслы азық-аўқат саўда кәрханасында санитариялық тексериў өткерилди.   Тексериў даўамында анықланған кемшиликлер бойынша “SHOMANAY GOLDEN HOUSE” ЖШЖ баслығы қарсысына Өзбекстан Республикасы Ҳәкимшилик жуўапкершилик ҳаққында кодекстиң 53-статьясы ҳәмде 54-статьясы 2-бөлиминде нәзерде тутылған ҳәкимшилик хуқықбузарлықты ислегенлиги бойынша ҳәкимшилик баянлама толтырылды ҳәмде топланған ис хүжжетлери Жынаят ислери бойынша Шоманай районы судына жиберилди.