Кеселлик ҳаққында билим – әҳмийетли қорғаныў қуралы

Қрым-Конго геморрагиялық ысытпа (ҚКГЫ) кеселлиги эпидемиологиялық мәўсимине таярлық шеңберинде Қарақалпақстан Республикасы санитария-эпидемиологиялық тынышлық ҳәм жәмийет саламатлығы басқармасы, орынлардағы бөлимлери қәнигелери тәрепинен тәбийий ошақлы аймақларда жасаўшы ҳәм хызмети шөл зоналары менен байланыслы пуқаралардың ҚКГЫ кеселлиги, оның жуғыў жоллары ҳəм профилактикасы ҳаққындағы түсиник дәрежесин үйрениў ҳәм халық арасында санитариялық түсиндириў жумыслары әмелге асырылмақта.

Қоңырат районы алыс аймақларында жасаўшы мақсетли контингент арасында мағлыўмат тарқатыў мақсетинде Қарақалпақстан Республикасы «Қаракөлшилик»  бирлеспеси баслығы А.Утемуратов, «Қоңырат қаракөлшилик» кластери ЖШЖ баслығы А.Жазыкбаев, Қарақалпақстан Республикасы телевидениесиниң Қоңырат районы бойынша хабаршысы ҳәм операторы менен биргеликте хызмет сапары шөлкемлестирилди.

Хызмет сапары даўамында жоқарыда атап өтилген басшы хызметкерлер, «Қоңырат қаракөлшилик» кластери ЖШЖ қараслы «Үстирт қаракөлшилик орайы» ислеп шығарыў кооперативи, «Берик Жанат» ҳәм «Пион астра» фермер хожалықлары баслықлары, жумысшылары, шопанлары, шопан жәрдемшилери ҳәм шаңарақ ағзалары түсиндириў жумыслары менен қамтылды.

Ғалаба хабар қураллары арқалы мағлыўмат тарқатылыўына қарамастан алыс аймақларда жасаўшы ҳәм хызмет етиўшилер арасында, тилекке қарсы кеселлик, жуғыў жоллары ҳәм алдын алыў иләжлары ҳаққында тийисли мағлыўматқа ийе емеслер көпшиликти қурайды. Жасаў шараяты, мағлыўматтың әдеттеги жоллар менен жетип бармаўы бул контингент пенен тиккелей сәўбетлесиў зәрүрлигин көрсетти.

Телевидение журналисти ҳәм басшы хызметкерлерге қосымша түсиндириў өткериўди даўам етиў мақсетинде «Қрым-Конго геморрагиялық ысытпа кеселлиги ҳәм оның алдын алыў иләжлары» атамасындағы тарқатпа материаллары берилди. Оларға ҚКГЫ кеселлиги бойынша эпидемиологиялық жағдай, профилактикалық иләжлар, оларды өткериўдеги басшылардың роли ҳәм жумыс пайытында кеселлик жуқтырыўдың алдын алыў ҳаққында түсиник берилди, усы мағлыўматлардың жумысшыларға түсиндириў зәрүрлиги айтылды.

Бул хызмет сапарын шөлкемлестириўде жақыннан жәрдем бергени ушын Қарақалпақстан Республикасы «Қаракөлшилик»  бирлеспеси баслығы А.Утемуратов ҳәм «Қоңырат қаракөлшилик» кластери ЖШЖ баслығы А.Жазыкбаевқа өз миннетдаршылығымызды билдиремиз.

 

 

ҚР СЭТҳәмЖС басқармасы

АҚЖКБ эпидемиолог врачы                                             Н.Низаматдинова