Өзбекстан Республикасы халқын 2023-жылда дизимге алыныўы ҳаққында

Мәмлекет пуқаралары ҳаққындағы мағлыўматлар ҳәр қандай мәмлекеттеги миллий статистиканың зәрүрли бөлеги есапланади. Бундай мағлыўматлар арнаўлы бир ўақыт аралығында халықты дизимге алыў иләжлары арқалы топланады. Олар тек-ғана бир мәмлкеттиӊ емес, бәлким Жер жүзи халқының саны, социал жағдайы, дәраматлары сыяқлы бир қанша зәрүрли информацияларды есаплап барыўға хызмет етеди.
2015-жылда БМШ ныӊ “2020-жылда халық ҳәм турақ-жай фондын дизимге алыў бойынша принциплер ҳәм усыныслар” резолюциясы қабыл етилип, 2020-жылғы раундына старт берилген еди. Бул процесс 2015-жылдан 2025-жылға шекем болған дәўирди өз ишине алады. Өзбекстанда өз халқын дизимге алыўды режелестирген мәмлекетлер қатарынан жай алды. Бирақ коронавирус пандемиясының жәҳән бойлап кең тарқалыўы көплеген жағдайлар сыяқлы халықты дизимге алыўды шөлкемлестириў ҳәм өткериў процесслеринеде өзиниң унамсыз тәсирин көрсетти. Көпшилик мәмлекетлерде илаж мүддети өзгертирилди.
Мәмлекетимиздеде 2022-жылда өткерилиўи жойбарластырылған бул процесс 2023-жылдың 1-25-ноябрь күнлерине көширилди. Бул Министрлер Кабинетиниӊ 2020-жыл 11-ноябрьдеги “Өзбекстан Республикасында 2023-жылда халықты дизимге алыўға таярлық көриў ҳәм өткериў иләжлары ҳаққында”ғы қарары менен тастыйықланды.
Халықты дизимге алыў, әўеле, мәмлекет ямаса ҳүкимет емес, бәлким жәмийеттииң өзи ушын зәрүр болып, ол ўақыты-ўақыты менен өз-өзин айнада көриў арқалы раўажланыў нәтийжелерин баҳалаў мүмкиншилиги болып табылады. Бул иләжда қатнасып атырған ҳәр бир пуқара өзи ҳаққындағы мағлыўматларды усыныс ете отырып, өзлери тийисли болған адамлар топарына тийисли социал программаларды ислеп шығыўда қатнасады.

Қарақалпақстан Республикасы Статистика басқармасы