МӘМЛЕКЕТЛИК БАҒДАРЛАМАНЫҢ ОРЫНЛАНЫЎЫ ЖӘМИЙЕТЛИК ҚАДАҒАЛАЎДА

Усы жыл 8-июнь күни Қарақалпақстан Республикасы Халық билимлендириӯ министрлигиниң мәжлислер залында 2022-жылғы Мәмлекетлик бағдарламаның 199-бәнти (Улыўма билим бериў мектеплеринде кәсип үйрениў нийетинде болған питкериўшилерин мәмлекет тәрепинен кеминде бир кәсипти ийелеўине көмеклесиўши системаны енгизиў бойынша усынысларды киргизиў) ҳәм 211-бәнти (Қарақалпақстан Республикасы ҳәм Хорезм ўәлаятында тәжирийбе-сынақ жол менен басланғыш класс (1-4-класс) оқыўшыларын бийпул аўқат менен тәмийинлеў системасы енгизиў) бойынша Қарақалпақстан Республикасында әмелге асырылып атырылған жумыслардың орынланыў барысына бағышланған жәмийетшилик тыңлаўы болып өтти. Илажды «Юксалиш» улыўма миллий ҳәрекети Қарақалпақстан Республикасы аймақлық бөлиминиң баслығы Т.Романов кирис сөз бенен ашты ҳәм алып барды. «Юксалиш» улыўма миллий ҳәрекети Қарақалпақстан Республикасы аймақлық бөлими тәрепинен шөлкемлестирилген илажға Қарақалпақстан Республикасы Жоқарғы Кеңеси депутатлары, Халық депутатлары қала ҳәм районлар Кеңеслери депутатлары, министрлик, мәкеме ҳәм шөлкемлер басшылары, мектеп директорлары, Раўажланыў стратегиясын қоллап-қуўатлаўшы жәмийетшилик топары ағзалары, мәмлекетлик емес коммерциялық емес шөлкемлери, сиясий партиялардың ўәкиллери ҳәм де ғалаба хабар қураллары ўәкиллери қатнасты. Өзбекстан Республикасы Президентиниң «2022-2026 жылларға мөлшерленген Жаңа Өзбекстанның раўажланыў стратегиясы ҳаққында»ғы Пәрманында Әдиллик министрлиги, Есап палатасы, «Тараққиёт стратегиясы» орайы ҳәм «Юксалиш» улыўма миллий ҳәрекети менен биргеликте Раўажланыў стратегиясы ҳәм де Мәмлекетлик бағдарламалардың сапалы ҳәм ўақытында орынлаўын системалы мониторинг етиў, соның менен бирге, Пәрманда Раўажланыў стратегиясын қоллап-қуўатлаўшы жәмийетшилик топарларын шөлкемлестириў ҳәм системалы түрде жәмийетшилик еситиўлерди өткерип барыў керек екенлиги белгиленген. Пәрманда белгиленген усы ҳәм басқа да тийисли ўазыйпалардың орынланыўын тәмийинлеў мақсетинде, усы жылдың 13-апрель күни Қарақалпақстан Республикасы Министрлер Кеңесинде өткерилген мәжилисте Раўажланыў стратегиясын қоллап-қуўатлаўшы жәмийетлик топардың қурамы тастыйықланды. Мәжилис баяннамасы қарары менен жәмийетшилик топарға Жаңа Өзбекстанның 2022-2026-жылларға мөлшерленген Раўажланыў стратегиясы шеңберинде қабыл етилген 2022-жыл ушын тастыйықланған Мәмлекетлик бағдарламаның бәнтлериниң орынланыўын үйрениў бойынша мониторинг жумысларын алып барыў ҳәм нәтийжелери бойынша жәмийетлик тыңлаўларды өткерип барыў, сондай-ақ, министрликлер, мәкемелер ҳәм шөлкемлер баслықларына ҳәмде қала ҳәм  район ҳәкимликлерине жәмийетшилик топары сораўнамалары тийкарында Мәмлекетлик бағдарламаның бәнтлериниң орынланыўы ҳаққындағы мағлыўматларды белгиленген мүддетлерде усынып барыў ўазыйпасы жүкленген. Буннан кейин Қарақалпақстан Республикасы Халық билимлендириў министри Р.Реимов 2022-жылғы Мәмлекетлик бағдарламаның 199-бәнти (Улыўма билим бериў мектеплеринде кәсип үйрениў нийетинде болған питкериўшилерин мәмлекет тәрепинен кеминде бир кәсипти ийелеўине көмеклесиўши системаны енгизиў бойынша усынысларды киргизиў) ҳәм 211-бәнти (Қарақалпақстан Республикасы ҳәм Хорезм ўәлаятында тәжирийбе-сынақ жол менен басланғыш класс (1-4-класс) оқыўшыларын бийпул аўқат менен тәмийинлеў системасы енгизиў) бойынша Қарақалпақстан Республикасында әмелге асырылып атырылған жумыслардың орынланыў барысы туўралы шығып сөйледи.

Соң Қарақалпақстан Республикасы санитария- эпидемиологиялық  тынышлық Басқармасы орынбасары М.Шамшетов, Қарақалпақстан Республикасы Бәнтлик ҳәм мийнет қатнасықлары министри орынбасары Б.Илъясов ҳәм «Бахытлы Гулдана Нукус» ЖШЖ директоры З.Кожаметовлар шығып сөйледи. Өзбекстан Республикасы «Жәмийетшилик қадағалаў ҳаққында»ғы Нызамының 6-статьясына муўапық быйылғы жылғы Мәмлекетлик бағдарламаның 199- ҳәм 211-бәнтлери бойынша тийисли тараўлар басшыларының есабатлары жәмийетшилик ўәкиллери тәрепинен тыңланды. Жәмийетшилик тыңлаў  қатнасыўшылары баянатшыларға өзлерин қызықтырған сораўларын берди. Жәмийетшилик тыңлаўда көтерилген мәселелер жүзисинен пикир-усыныслар билдирилди. Тийкарғы мақсет, Мәмлекетлик бағдарламада белгиленген ўазыйпалардың орынланыўын жәмийетшилик қадағалаў тийкарында үйрениў, жәмийетшилик тыңлаўда додалаў сол арқалы жол қойылып атырған кемшиликлерди сапластырыўдан ибарат. Алдағы ўақытлары басқа тараўларда да усындай жәмийетшилик еситтириўлер өткерилип, оның жуўмағы тийисли тармақ басшылары қатнасында додаланып барылады.