“Спорт – саламатлық гиреўи” сүрени астында Спартакиада жарыслары өткерилди

Кейинги жыллары басқа тараўлар сыяқлы денсаўлықты сақлаў тараўында-да Өзбекстан Республикасы Президентиниң 2020-жыл 30-октябрьдеги «Саламат турмыс тәризин кең ен жайдырыў ҳәм ғалабалық спортты және де раўажландырыў ис-илажлары ҳаққында»ғы ПП-6099 санлы Пәрманы тийкарында хызметкерлер арасында спорт жарысларын шөлкемлестириў арқалы олардың бос ўақытларын мазмунлы өткериў ҳәм ғалабалық спортқа кең түрде тартыў арқалы саламат турмыс тәризин үгит-нәсиятлаў бойынша қатар илажлар әмелге асырылмақта.

“Спорт-саламатлық гиреўи” сүрени астында Спартакиада жарысларының өткерилиўи сөзимиздиң айқын мысалы болып, бундай спорт жарысларын шөлкемлестириў тараўда дәстүрге айланған.
2022-жылдың 07-октябрь күни Қарақалпақстан Республикасы Денсаўлықты сақлаў министрлиги ҳәм Өзбекстан Республикасы Денсаўлықты сақлаў хызметкерлери кәсиплик аўқамының Қарақалпақстан Республикасы Кеңеси менен биргеликте Нөкис қаласындағы Абу Али Ибн Сино атындағы жәмийетлик саламатлық техникумының спорт базасында Республикалық профилактикалық емлеў мәкемелери хызметкерлери арасында саламат турмыс қәлпин енгизиў, оларды спортқа кеңнен тартыў мақсетинде “Спорт-саламатлық гиреўи” сүрени астында Спартакиада спорттың армрестлинг, шашка, стол тенниси, жеңил атлетика, дартс ҳәм арқан тартыў түрлери бойынша шөлкемлестирилди.
Спартакиаданың ашылыў салтанатында Қарақалпақстан Республикасы Денсаўлықты сақлаў министриниң аналық ҳәм балалықты қорғаў ҳәмде репродуктив саламатлық бойынша орынбасары Асқаров Акмал Алишерович, Өзбекстан Республикасы Денсаўлықты сақлаў хызметкерлери кәсиплик аўқамының Қарақалпақстан Республикасы Кеңеси баслығы Байбосынова Лизахан Алламбергеновналар қатнасты.
Спартакиада жуўмағында Республикалық профилактикалық емлеў мәкемелери хызметкерлери арасында улыўма командалық есап бойынша:
Карақалпақстан Республикасы санитария эпидемиялогиялық тынышлық ҳәм жәмийет саламатлығы басқармасы 1-орынды;
1-санлы Республикалық руўхый ҳәм неврологиялық диспанери II-орынды;
Республикалық Оба профилактикасы орайы Қарақалпақстан филиалы III-орынды ийеледи.
Спартакиада жуўмағында жеңимпазлар Қарақалпақстан Республикасы Денсаўлықты сақлаў министрлиги менен Өзбекстан Республикасы Денсаўлықты сақлаў хызметкерлери кәсиплик аўқамының Қарақалпақстан Республикасы Кеңесиниң биргеликтеги тийисли дәрежедеги кубоклары, дипломлары, медальлары ҳәм де баҳалы саўғалары менен сыйлықланды.
Соның менен бир қатар «Ең жасы үлкен қатнасыўшы», “Ең шебер ҳәўескер қатнасыўшы”, “Жеңиске болған интәси ушын”, “Ең жасы киши қатнасыўшы” номинациялары жеңимпазлары да тийисли дәрежедеги дипломлар ҳәм де баҳалы саўғалар менен сыйлықланды

Өзбекстан Республикасы Денсаўлықты сақлаў
хызметкерлери кәсиплик аўқамының
Қарақалпақстан Республикасы
Кеңеси