14-январь Уатан қорғаўшылар күни. Елимиз тынышлығы ҳәм турақлылығының беккем қорғаны

Биринши  Президентимиздиң  басламасы  менен  1992-жыл  14-январьда  елимиз  парламентиниң  «Озбекстан  Республикасы  аймағында  жайласқан  әскерий  бөлимлер  ҳәм  әскерий  оқыў  мәкемелери  ҳаққында»  ғы  қарары  қабыл  етилиўи  тарийхый  әҳмийетке  ийе  болып  есапланады.  Усы  күннен  баслап  елимиз  аймағындағы  барлық  әскерий  бөлим  ҳәм  мәкемелер Озбекстан  Республикасының  қарамағына  өткерилди.1993-жыл
29-декабрде  қабыл  етилген  Озбекстан  Республикасының  нызамына  муўапық  14-январь  Уатан  қорғаўшылары  күни,  деп  жәрияланды.  Бул  тарийхый  ҳүжжетке  тийкарланып  Уатан  қорғаўшылары  күни  елимизде  улыўмахалықлық  байрам  сыпатында  кеңнен  белгиленип  келинбекте.

1990-жылы  жергиликли  офицерлер  елимиздеги  әскерий  кадрлардың  тек  ғана  0,6  процентин  қурайтуғын  еди.  Бул  машқаланы  шешиў  мақсетинде  әскерий  билимлендириў  системасы  түп-тийкарынан  реформаланды.  Бир  қатар  жоқары  әскерий  оқыў  орынларының  жумысы  жолға  қойылып,  оларда  әскерий  хызметке  жоқары  потенциалы,  ерк-ықрары  беккем,  ғайратлы,  мәрт  ҳәм  батыр  кадрларды  таярлаўға  кирисилди.

Армия  жас  әўладымыз  ушын  ҳақыйқатында  да  мәртлик  ҳәм  беккем  ерк-ықрарды, жоқары  дәрежедеги  Уатан сүйиўшилик  сезимин,  Уатанымызға  сүйиспеншилик  ҳәм  садықлық  сезимлерин  тәрбиялайтуғын  турмыс  мектебине  айланғаны  менен  көзге  түседи.

Хар жылы  Уатан  қорғаўшылар  күни  елимизде  «Таянышым  ҳәм  сүйенишим,  мақтанышымсаң,  муқаддес  Ўатан!»  сүрени  астында  белгиленип келмекте. Сол қатарда Қарақалпақстан Республикасы санитария-эпидемиологиялық агентлик орайы жәмәәти 14-январь Ўатан қорғаўшылар күни менен мәрт ҳәм ғайратлы жигитлеримизди гуллән қутлықлап қаламыз.

Қарақалпақстан Республикасы санитария-эпидемиологиялық агентлик орайы жәмәәтшилик пенен ислесиу болими.