Хожели районында арнаӯлы – тактик оқыӯ шынығыӯы өткерилди.

Қарақалпақстан Республикасы Министрлер Кеңеси Баслығы – Пуқара қорғаныӯы баслығының 2020-жыл 13-феврал күнги 5-санлы буйрығы орынланыӯын тәмийинлеӯ мақсетинде Хожели районында “Адамлар ҳәм ҳайӯанлар арасында қутырыӯ кеселлигиниң алдын алыўда айрықша жағдайларда ҳәрекет етиў ҳәм олардың алдын алыў мәмлекетлик төменги аймақлық дизимлери менен биргеликтеги ҳәрекети” темасында арнаўлы-тактик оқыў шынығыўы өткерилди.

Арнаўлы – тактик оқыў шынығыўы өткериӯ орны сыпатында Хожели районы Саманкөл АПЖ аймағы белгиленди.

Оқыў шынығыўы 2 бөлимде болып өтти:

1 – теориялық бөлимде Хожели районы “Саманкөл” АПЖ Мәденият сарайы залында семинар түринде болып өтти.

Бунда, мәжилисти Қарақалпақстан Республикасы Айрықша жағдайлар басқармасы бөлим баслығы Е.Жүзбаев ашып берди ҳәм өз сөзинде қутырыӯ кеселлигиниң алдын алыӯ иләжлери, оқыӯ шынығыӯының әҳмийети ҳаққында сөз етти.

Оннан соң Қарақалпақстан Республикасы Ветеринария ҳәм шарӯашылықты раӯажландырыӯ комитети үй хайӯанларының саӯлығын қорғаӯ бөлими баслығы М.Сагызбаев қутырыӯ кеселлигиниң хаӯанлар арасында ушыраӯы, тийкарғы жуғыӯ себеплери, клиник белгилери ҳаққында жыйналғанларға түсиник берди.

Қарақалпақстан Республикасы Республикалық балалар жуқпалы кеселликлер емлеӯханасы шыпакери А.Қудайназаров адамларда қутырыӯ кеселлигиниң келип шығыӯы, клиникасы, диагностикасы, алдын алыӯ иләжлери ҳаққында айтып өтти.

Қарақалпақстан Республикасы Санитария-эпидемиологиялық тынышлық Орайы бас врач орынбасары В.Абсаттарова адамлар арасында қутырыӯ кеселлигиниң дизимге алыныӯы ҳәм адам өмири ушын қәӯиплилилиги ҳаққында сөз етти.

Хожели районы Санитария-эпидемиологиялық тынышлық Орайы врач эпидемиологы А.Ордабаева қутырыӯ кеселлигиниң эпидемиологиясы, эпизоотологиясы ҳәм профилактикасы ҳаққында сөз етти;

Хожели районы ветеринария бөлими эпизоотологы хайӯанлардағы қутырыӯ кеселлиги жуғыӯ жоллары, эпизоотологиясы, вакцина ислеу тәртиби, кеселликтиң алдын алыу иләжлери ҳаққында сөз етти.

Семинар соңында тыңлаӯшылар тәрепинен берилген тийисли сораӯларға жуӯаплар берилди.

2 – әмелий бөлиминде пуқараның ҳайӯаннан жәбирленгенинде медицина, санитария-эпидемиология тынышлық орайы, ветеринария ҳәм абаданластырыӯ басқармасы ийт аӯлаӯ бригадасы, ишки ислер бөлими хызметиниң ҳәрекетлери әмелде көрсетип берилди:

  • Яғный – ҳайӯаннан жәбирленген пуқараға Хожели районы Айбек АШПда клиник көриктен өткериӯ, биринши антирабик жәрдем көретиӯ, жарақатқа ислеӯ бериӯ, тез хабар бериӯ тәртиби;
  • Санитария – эпидемиологиялық тынышлық орайы хызметкерлери тәрепинен жәбирлениӯшиден эпидемиологиялық мағлыӯматларын жыйнаӯ, ошақ шегарасын анықлаӯ ислери әмелге асырылды;
  • оннан соң эпидемиологлар ийт ийесинен, жәбирленген пуқаралардың шаңарақ ағзалары менен сәӯбет өткериӯ, медицина хызметкерлери менен бирге басқа жәбирленгенлер бар жоқлығы анықланды;
  • Оннан соң ветеринария хызмети тәрепинен ҳайӯанларды көриктен өткериӯ, қутырыӯ кеселлигине қарсы емлеӯ, паспорт толтырыӯ, справка бериӯ тәртиби әмелде көрсетип берилди;
  • Районлық абаданластырыӯ басқармасы ийт аӯлаӯ бригадасы тәрепинен қанғымай ийтти услап алып кетиӯ ҳәм жоқ етиӯ;
  • Профилактика инспекторы тарепинен пуқараға жәбир жеткерген ийт ийесине қарата ийт сақлаӯ қағыйдаларын сақламағанлығы ушын баянлама толтырыӯ тәртиби түсиндирилди.

Оқыў шынығыўы соңында тийисли мәкеме, шөлкемлер ҳәм арнаўлы-тактик оқыў шынығыўы қатнасыўшылары менен бирге шынығыў додаланды, қызықтырған сораўларға жуўаплар берилди, кеселликтиң келип шығыўының алдын алыў мақсетинде тийисли усыныс ҳәм тапсырмалар берилип, бундай шынығыӯлар барлық қала ҳәм районларда өткерилетуғынлығы айтылды. Хожели районында қутырыӯ кеселлигиниң алдын алыӯ бойынша болып өткен шынығыӯ “ШЕКЛЕНГЕН ТАЯР” деп баҳаланды.

 

Қарақалпақстан Республикасы
Санитария-Эпидемиологиялық тынышлық орайы
жәмийетшилик пенен ислесиӯ бөлими баслығы И.Байназаров