Қарақалпақстан Республикасына «қызыл» дәрежеси берилди, карантин жумсартылмайды

Карантин илажлары жумсартылатуғын район ҳәм қалалар «қызыл», «сары», «жасыл» аймақларға ажыратылады. Қарақалпақстан Республикасына «қызыл» дәрежеси берилди. Бул ҳаққында Президент Шавкат Мирзиёев басшылығында 5-май күни болып өткен видеоселектор жыйналысында айтып өтилди хəм бүгинги, яғный 6-май күнги Республика арнаўлы комиссиясының қарарында белгиленди. Жыйналыста Қарақалпақстандағы айрым район ҳәм қалалар усы әмелиятқа мысал сыпатында көрсетилген. Атап айтқанда, Мойнақ (9 адамда) ҳәм Қоңыратта (10 адамда) кеселлик анықланған болса да, бул аймақлар «сары» аймаққа киргизиледи. Себеби, кеселлик тийкарынан карантин аймақларында анықланған болып, халық арасында бақланбаған. Нөкис қаласына болса (79 адамда вирус анықланған) «қызыл» дәрежеси бериледи. Шавкат Мирзиёев жуўапкерлерге қысқа ўақытта аймақлардың карантин дәрежесин анықлаў бойынша тапсырма берди. Орынларда жағдайдың өзгериўине қарай, карантин дәрежеси де өзгерип барады. Сонлықтанда, Республикамыз аймағында карантин шараларына əмел еткен халда жумыс алып барылады. Алдын хабар бергенимиздей жеке автомашинада күнниң айырым ўақытларында ҳəрекетлениўге рухсат берилгени өз күшинде сақланып қалады. Яғный, жеке автомобиллеринен азанғы саат 07:00 ден 10:00ге шекем ҳәм 17:00 ден 20:00ге шекем пайдаланыўға рухсат бериледи. Бунда жумысқа барыў-келиў, емлеўханаға, дәри-дармақ сатып алыўға шыққаны тийкарғы мақсет болыўы керек. Такси хызметлерине ҳәзирше тек ғана жеткерип бериў хызмети менен шуғылланыўға рухсат етилген, жолаўшы тасыўға рухсат берилмеген. Сонлықтан, пайтахтымыздағы такси хызмети менен шуғылланыўшыларға жолаўшы тасыў менен шуғылланыў мәселесин тоқтатып турыўды сорап қалған болар едик. Қарақалпақстан Республикасы Транспорт министрлиги мəлимлеме хызмети