“TAZALÍQ-SALAMATLÍQTÍŃ GIREWI!”

Úlkemizge báhár pasılı kirip keliwi menen átirap-ortalıqtı abadanlastırıw, jasap atırǵan máhállelerimiz, gúzar jol boyları hám jap salmalardı tártipke keltiriw jumısları búgingi kúnnin áhmiyetli jumıslarınıń biri bolıp, usı tiykarda Qanlıkól rayonında ilájlar álle qashan baslap jiberilgen. Rayon hákimliginiń baslaması menen “Ekologiyalıq taza aymaqqa meniń úlesim” akciyası ótkerilip, Nókis-Beynew A-380 avtomagistral jolı boyına shıǵındı ıdısları qoyılıp, Qanlıkól rayonı kirer dárwazasına “Húrmetli aydawshılar, tábiyatımızdı azada saqlayıq! Sizler ushın arnawlı shıǵındı taslaw orınları shólkemlestirilgen”-degen atamada esletpeler qaraqalpaq, ózbek, rus hám inglis tillerinde jazıp qoyılǵan.

Qanlıkól rayonı Sanitariya-epidemiologiyalıq tınıshlıq hám jámiyet salamatlıǵı bólimi qániygeleride ekologiyanıń taza bolıwı hám pataslanıwdıń aldın alıw maqsetinde Nókis-Beynew A-380 avtomagistral jolı boyında shashılıp atırǵan shıǵındılardı jıynap, jol boyın jabayı shóplerden tazalap atır.

Átirap-ortalıqtı taza saqlaw, gigiena qaǵıydalarına ámel etiw arqalı biz ózimizdi hám átirapımızdaǵı insanlardı kóplegen keselliklerden qorǵaymız hám keselleniwdiń aldın alamız.
Qanlıkól rayonı Sanitariya-epidemiologiyalıq tınıshlıq hám jámiyet salamatlıǵı bólimi barlıq puqaralardı átirap-ortalıqtı taza saqlawǵa,  jeke gigienaǵa ámel etiwge hám shıǵındılardı belgilengen orınǵa  taslawǵa  ádetleniwge shaqıradı!