Усы жылдың 15-февраль күни 1-санлы Республика психо-неврологик кеселликлер диспансериниң мажлислер залында «Карантин хәм аса қаўипли жуқпалы кеселликлер эпидемиологиясы, клиникасы, емлениўи ҳәм профилактикасы» темасында семинар шөлкемлестирилди.

Семинарда ҚР СЭТ ҳәм ЖСБ врач эпидемиологы Г. Сейтбаева Қутырыў кеселлиги этиологиясы, эпидемиологиясы ҳәм профилактикасы бойынша қатнасыўшыларға презитация арқалы түсиник берди. Презинтацияда қутырыў ыссы қанлы ҳайўанларда ушрайтуғын, нейротроп вирус қозғататуғын, кеселленген ҳайўанның силекейи менен тислеўи, тырнаўы арқалы жуғатуғын, орайлық нерв системасын жарақатланыўы менен ѳтетуғын ҳәм бүгинги күнде ѳлим менен жуўмақланатуғын аса қәўипли жуқпалы кеселлик екенлиги ҳәм оның профилактикасы бойынша айтып өтти. Соң от жара кеселлиги клиникасы, диагностикасы ҳәм емлеў усыллары ҳаққында сөз етти. Қәнийге көргизбе материалы арқалы от жара кеселлиги – зоонозлар топарына кириўши өткир жуқпалы кеселлик екенлиги, бул кеселликти спора пайда етиўши бактерия «Bacillus antracis» шақырыўы, кеселлик адамларға кеселленген ҳайўанлар менен, олардыӊ өликлери менен, кесел ҳайўанлар өнимлери менен туўрыдан туўры қатнаста болғанда жуғыўын, кеселликтиӊ тери, өкпе, ишек, орофренгиал формалары бар екенлиги ҳаққында сондай-ақ, кеселликтиӊ клиникасы диагностикасы ҳәм емлеў усыллары ҳаққында толық мағлыўмат берди.

Семинарда инфекционист врач Н.Аметова ККГЫ этиологиясы, эпидемиологиясы ҳәм профилактикасы бойынша сөзге шықты. Көргизбе материалында Қырым-Конго геморрагик ысытпасы – «buniamvirus» топарына кириўши «Kongo» вирусын шақырыўшы кеселлик екенлиги, кеселлик аўыр диатез болыўы ҳәм өлим көрсеткишлериниӊ жоқарылығы менен характерлениўи, тәбийий ошақларда, яғный шөл ҳәм ярым шөл, қурғақшылық орынларында вирус кемириўшилер, қоян тәризлилер ҳәм шыбын ширкей жеўшилер денесинде бар болып, усы ҳайўанлар кеселлик қозғатыўшысыныӊ дереги болатуғынлығы, тыйкарғы вирус тасыўшы ҳәм вирус дереги искод кенелери «Hyalomma» туқымласына кириўшилер ҳәм кемирек жағдайларда «Rhipicephalus» пенен «Boophilus» әўладына кириўши искод кенелерде-де вируслар сақланыўы, адамлар көбинесе усы кенелер шағыўы нәтийжесинде кеселлениўи, кем жағдайларда болса ҳайўанларды сақлаў ўақтында кенени езип таслаў нәтийжесинде де адамлар кеселлениўи мүнкинлигин айтты.

Семинар даўамында РОПО ҚҚ филиалы врачы Т.Байниязова сөзге шығып оба кеселлиги бойынша қатнасыўшыларға түсиник берди. Қәнийге тәрепинен оба кеселлиги тәбийий ошақлы, аса қәўипли, зооноз, бактериал инфекция болып, жоқары температура, лимфатик системаныӊ зыянланыўы, сепсис, пневмония белгилери менен кешетуғын ҳәм өлимшилик жағдайларыныӊ жоқарылығы менен характерлениўи, бул кеселликтиӊ регионал лимфаденит, бубонсыз септицимия ҳәм оба пневмониясы сыйақлы клиник белгилери бар екенлиги, қозғатыўшысы «Yersinia pestis, Enterobacteriaceceae» семьясына, яғный «Yersinia» әўладына тийисли екенлиги ҳәм кеселликтиӊ келип шығыўы, кешиўи, клиникасы, диагностикасы, эпидемиологиясы ҳәм профилактикасы ҳаққында толық мағлыўмат берди.

Семинар соңында қатнасыўшылар тәрепинен берилген сораўларға жуўап берилип, ислениўи тийис болған профилактик ҳәм эпидемияға қарсы ис-илажларды күшейтиў, олардың нәтижелилигин асырыў бойынша тапсырмалар берилди.

ҚР СЭТ ҳәм ЖСБ эпидемиолог врач
Гүллала СЕЙТБАЕВА